మిట్స్ విద్యార్థులకు సాంకేతిక పరిజ్ఞానం పై అవగాహన
నమిత న్యూస్ - Andhra Pradesh / Annamayya : మదనపల్లె - మే 12 : మదనపల్లి సమీపంలో ని అంగళ్ళు వద్ద మిట్స్ డీమ్డ్ టు బి యూనివర్సిటీ నందు డేటా సైన్స్ విభాగం వారు మిట్స్ ఇండస్ట్రీ రిలేషన్స్ సెల్ వారి ఆధ్వర్యంలో ఇంజనీరింగ్ మొదటి సంవత్సరం విద్యార్థులకు ఆధునిక సాంకేతిక పరిజ్ఞానంపై అవగాహన పెంపొందించుకునే లక్ష్యంతో బెంగళూరు లోని ట్రెసా మోటార్స్ సంస్థకు విద్యా పారిశ్రామిక సందర్శనను నిర్వహించారు. సందర్శన సందర్భంగా రోబోటిక్స్ నిపుణులు రోబోట్ల రూపకల్పన, తయారీ ప్రక్రియ, ఆధునిక సాంకేతికతలు, పరిశ్రమల్లో రోబోట్ల వినియోగం వంటి అంశాలను విద్యార్థులకు వివరించారు. విద్యార్థులు తయారీ విభాగాన్ని సందర్శించి రోబోటిక్ భాగాల రూపకల్పన, అమరిక విధానాలను ప్రత్యక్షంగా పరిశీలించారు. ఈ సందర్శనలో ట్రెసా మోటార్స్ సంస్థ సీనియర్ రోబోటిక్స్ ఇంజనీర్ మనోజ్ మాట్లాడుతూ రోబోటిక్ భాగాల తయారీలో అవసరమయ్యే ఖచ్చితత్వం, ప్రణాళిక మరియు సాంకేతిక నైపుణ్యాల ప్రాముఖ్యతను వివరించారు. ముఖ్యంగా హ్యూమనాయిడ్ రోబోట్లతో విద్యార్థుల ప్రత్యక్ష పరస్పర చర్య కార్యక్రమానికి ప్రధాన ఆకర్షణగా నిలిచింది. హ్యూమనాయిడ్ రోబోట్ల పనితీరు, కదలిక నియంత్రణ, సెన్సర్లు మరియు కృత్రిమ మేధస్సు ఆధారిత సాంకేతికతలపై విద్యార్థులు ప్రత్యక్ష అవగాహన పొందారు. ఈ పారిశ్రామిక సందర్శన ద్వారా విద్యార్థులు రోబోటిక్స్, ఆటోమేషన్ మరియు ఆర్టిఫిషియల్ ఇంటెలిజెన్స్ రంగాలపై విలువైన జ్ఞానాన్ని పొందడమే కాకుండా భవిష్యత్ ఉపాధి అవకాశాలపై కూడా స్పష్టమైన అవగాహనను సంపాదించారని నిర్వాహకులు తెలిపారు. కార్యక్రమంలో డాక్టర్ ఎం. కిరణ్ కుమార్ మరియు బి. విద్యాశ్రీ ల అధ్యాపక బృందం మరియు మొత్తం 46 మంది విద్యార్థులు పాల్గొన్నారు
Reporter
Namitha News
మరిన్ని వార్తలు
Developed By :
